‘Viongozi halmashauri simamieni dawa za serikali’

VIONGOZI wa halmashauri nchini kwa kushirikiana na waganga wakuu wametakiwa kuhakikisha dawa na vifaa tiba vinavyotolewa na serikali kupitia Bohari Kuu ya Dawa (MSD) vinatumika kwa kazi iliyokusudiwa.

Agizo hilo lilitolewa mjini hapa jana na Naibu Waziri Wizara ya Afya na Ustawi wa Jamii, Dk. Kebwe Stephen Kebwe, katika ziara ya kwanza tangu ateuliwe kuwa waziri akiongozana na Kamati ya Kudumu ya Bunge ya Huduma za Jamii katika kukagua taratibu za usambazaji wa dawa, vituo na hospitali za serikali Masasi, mkoani Mtwara.

Kebwe alisema kumekuwepo na malalamiko ya muda mrefu huhusu utumiaji mbaya wa dawa hizo, jambo linalowakosesha huduma bora wananchi na kukosa imani na serikali yao.

Alieleza hali hiyo inatokana na baadhi ya watendaji na wafanyakazi kutokuwa waaminifu  na kutimiza wajibu wao, hivyo kuchangia kwa kiasi kikubwa kuwapaka matope hata wasio na tabia hiyo.

Alitumia fursa hiyo kuzitaka hospitali za serikali kutumia vyanzo vingine vya mapato ili kununua dawa na vifaa tiba katika kuongezea matumizi mbalimbali na bajeti ya serikali.

Mwenyekiti wa Kamati ya Kudumu ya Bunge ya Huduma za Jamii, Margaret Sitta, alisema ni muhimu suala la upatikanaji wa dawa na vifaa tiba kupewa kipaumbele cha hali ya juu kutokana na kuwa ndio msingi wa huduma bora za afya kwa jamii.

Sitta alisema kutokana na ufanisi mkubwa uliopo katika upatikanaji wa dawa hospitalini na vituo vya afya baada ya mfumo wa ufikishaji dawa moja kwa moja hadi vituoni (DD) unaofanywa na MSD ni vizuri serikali kutambua kuwa ufanikishaji wa hatua hiyo unahitaji uwezeshi hasa wa fedha, hasa  bajeti kufika kwa wakati.

Mjumbe wa Bodi ya wadhamini MSD, Dk. Ahmed Hingola, alisema endapo serikali itadhibiti na kuhakiki dawa chache zilizopo, ili kutekeleza mahitaji ni wazi lawama za wananchi kwa bohari ya dawa zitakwisha.

Chanzo;Tanzania Daima