Polisi Mtwara wahimiza ushirikiano

JESHI la Polisi mkoani Mtwara limewataka wananchi kuendeleza ushirikiano na mshikamano ili kudumisha amani na utulivu mkoani hapa.

Kamanda wa Polisi Mkoa wa Mtwara, Zelothe Stephen, alitoa kauli hiyo alipozungumnza na waandishi wa habari ofisini kwake.

Alisema wakati umefika kwa wananchi wa Mtwara kusahau mambo yaliyotokea mwaka jana na kuathiri amani na utulivu na sasa kuwaomba wayaangalie upya na kuyatafakari kwa umakini na kuyatafutia ufumbuzi badala ya kuyaendeleza.

Hata hivyo, alisema Jeshi la Polisi lipo tayari kushirikiana na wananchi ili kuhakikisha changamoto zinazojitokeza zinatumika kuwa fursa ya kutatua kero zilizopo likiwemo lile la kukabiliana na vitendo vya uhalifu.

Pia aliwashauri wananchi wanapokosana ni vema watumie viongozi wa serikali za mitaa, wa dini, wa mila ama wazee maarufu katika kutatua mashauri yanayosababisha kujigawa na yanaposhindikana wasisahau kuwa kuna mabaraza ya usuluhishi katika kata.

Pamoja na mambo mengine, kamanda huyo alisema mwaka jana yaliripotiwa matukio 10,233 ikilinganishwa na mwaka juzi 11,910.

Alisema makosa dhidi ya binadamu mwaka jana yalikuwa 212 na mwaka 2012 yalikuwa 209 ambayo ni sawa na ongezeko la makosa matatu.

Kwa upande wa makosa dhidi ya jamii, mwaka jana yalikuwa 448 na mwaka 2012 yalikuwa 451 ambayo ni sawa na upungufu wa makosa matatu, na makosa dhidi ya mali kwa mwaka jana yalikuwa 980 na mwaka 2012 yalikuwa 937, sawa na ongezeko la makosa 43.

Kwa upande wa makosa ya usalama barabarani kwa mwaka jana kulikuwa na ajali 177 kati ya hizo ajali 89 zilisababisha vifo.

Chanzo;Tanzania Daima