WANAHABARI WAHIMIZWA KUZINGATIA MAADILI

WAANDISHI wa habari mkoani Mtwara wametakiwa kusimamia, kuzingatia na kufuata misingi ya maadili ya kazi zao kwa kuandika habari zenye usahihi na ukweli ambazo zimefanyiwa uchunguzi wa kina ili kuleta maendeleo kwa jamii.

Ushauri huo umetolewa na Mkuu wa Wilaya ya Mtwara, Wilman Ndile, wakati akifungua mkutano wa wadau wa habari Mkoa wa Mtwara wa mwaka 2013 pamoja na uzinduzi rasmi wa rasimu ya Katiba ya Chama cha Akiba na Mikopo (Saccos) ya Chama cha Waandishi wa Habari Mkoa wa Mtwara (MTPC), uliofanyika hivi karibuni mjini hapa.

Mkutano huo  ulikuwa na  lengo la kujadili kero na changamoto zinazokabili tasnia hiyo ikiwemo kuibua na kuchangia fursa zilizopo mkoani hapa. Mkutano huo uliandaliwa na Klabu ya Waandishi wa Habari Mkoa wa Mtwara kwa ufadhili wa UTPC.

Ndile alisema waandishi wa habari inabidi wasimamie ukweli, kwani jamii imekuwa ikiwaamini waandishi wa habari  kwa kiwango kikubwa kuliko mtu yeyote.

“Ndugu zangu waandishi wa habari nyinyi ni watu muhimu katika jamii yetu na jamii yenyewe inawakubali waandishi wa habari kupita maelezo, lakini mnachotakiwa kufanya ni kuandika habari zenye usahihi na ukweli ili msipotoshe jamii,” alisema.

Mwenyekiti wa MTPC, Hassan Simba, alisema lengo la kuanzishwa kwa Sacoss hiyo ni  kuwasaidia  waandishi wa habari mkoani hapa katika nyanja mbalimbali.

Chanzo:Tanzania Daima