Kaya 12 zakosa makazi Mtwara

KAYA 12 za wakazi wa Magomeni A katika Manispaa ya Mtwara-Mikindani mkoani hapa, wamekosa mahala pa kuishi baada ya nyumba zao kubomolewa na mvua iliyonyesha hivi karibuni.

Akizungumza na waandishi wa habari ofisini kwake, Mkuu wa Wilaya ya Mtwara, Wilman Ndile, alisema kuwa kaya 12 hazina makazi huku zikihifadhiwa katika Shule ya Msingi Mangoela.

Ndile alisema kuwa mvua hizo zilinyesha siku ya mkesha wa Krismasi kuanzia saa 4 usiku hadi asubuhi na kusababisha uharibifu wa nyumba zaidi ya 10 na kuharibu vitu mbalimbali vilivyokuwepo ndani ya nyumba hizo vikiwemo vyakula.

Alisema kuwa walioathirika wengi ni wale wanaoishi mabondeni huku nyumba zao zikiwa sio imara.

Mkuu huyo aliwalalamikia watumishi wa Idara ya Mipango Miji Manispaa ya Mtwara-Mikindani, ambao wamehusika na utoaji wa vibali vya ujenzi katika maeneo ya miundombinu ya kupitishia maji ya mvua ambayo hayakustahili kujengwa makazi ya watu.

Alisema kuwa serikali kupitia Ofisi ya Waziri Mkuu imetoa tani 250 za mahindi huku wananchi wakilazimika kulipa sh 50 kwa kilo moja na kwa wasio na uwezo wakipewa bure.

Mmoja wa waathirika hao, Asha Chimpume, ameiomba serikali pamoja na wasamaria wema ambao wameguswa na tukio hili  kujitokeza kuwasaidia chakula kwa sababu kwa sasa hawana chakula kutokana na kusombwa na maji.

Chanzo;Tanzania Daima