DC awashukia maofisa ushirika kuwa kikwazo

Masasi. Mkuu wa Wilaya ya Masasi, mkoani Mtwara, Farida Mgomi amewashukia maofisa ushirika wilayani hapa kwamba ni chanzo cha kufanya halmashauri kushindwa kukusanya mapato ya ushuru wa mazao.

Akizungumza na madiwani na watendaji kwenye Baraza la Madiwani la Halmashauri ya Wilaya ya Masasi juzi, Mgomi alisema maofisa hao wamekuwa kikwazo.

Mgomi alisema kushindwa kukusanya mapato ya ushuru wa mazao hasa zao la korosho kwenye halmashauri zilizopo wilaya hapa, kunachangiwa na uzembe unaofanywa na maofisa ushirika.

Alisema wameshindwa kusimamia vizuri kutoka vyama vya msingi na kwamba, hali hiyo imekuwa ikizisababishia halmashauri kukosa mapato.

Mgomi alisema baadhi ya maofisa ushirika wamekuwa wakishirikiana na viongozi wa vyama vya msingi kukwepa ushuru wa halmashauri, kitendo ambacho alidai hatakifumbia macho.

Aliongeza kuwa vyama vya msingi wilayani hapa vimekuwa na tatizo kubwa kulipa ushuru wa ununuzi wa korosho kwa halmashauri, vimesababisha halmashauri kupata hasara ambayo inazifanya zishindwe kutekeleza baadhi ya shughuli za maendeleo.

“Uzembe unaofanywa na maofisa ushirika kwa kushindwa kusimamia vyema ukusanyaji ushuru wa ununuzi wa mazao hasa korosho kutoka vyama vya msingi, kunazisababishia halmashauri zishindwe kukusanya mapato kikamilifu,” alisema.

Alisema akiwa mkuu wa wilaya atahakikisha anawabana maofisa ushirika wasimamie ipasavyo ukusanyaji ushuru na kwamba, ofisa ushirika yeyote atakayebainika kufanya uzembe katika ukusanyaji mapato, ofisi yake itahakikisha inamshughulikia.

Alisema lengo ni kuziwezesha halmashauri kuweza kukusanya mapato kama zinavyotarajia.
Chanzo;Mwananchi