TIC yavutia uwekezaji kilimo cha korosho

KITUO cha Uwekezaji nchini (TIC) kimewashauri wawekezaji wa ndani na nje kutumia fursa kinazozitoa kwa wawekezaji  kuwekeza katika sekta ndogo ya zao  la korosho ili kuongeza uzalishaji wake.

Mkurugenzi Mtendaji  wa kituo hicho, Juliet Kairuki, alisema hayo jana wakati wa mkutano wa wadau wa sekta hiyo na kuongeza kuwa wanahitajika kukitumia kituo hicho ili kupata fursa zitakazowawezesha kuwekeza  zaidi katika uzalishaji wa zao hilo.

“Kituo chetu kinahamasisha wawekezaji wa ndani na nje ya nchi kuwekeza katika sekta hii ambayo ni muhimu katika uchumi wa nchi na ustawi wa jamii,” alisema Kairuki.

Alisema TIC imeweka vivutio mbalimbali kwa wawekezaji ambao wamejizatiti kuwekeza katika kilimo, ikiwamo misamaha ya kodi kwa bidhaa za mitaji.

Aliongeza kuwa Tanzania bado inahitaji wawekezaji kuwekeza katika kilimo cha zao hilo, viwanda vya kusindika na kuyatumia masoko ya ndani na nje ya nchi.

Sambamba na hilo, alisema Tanzania ina mfumo mzuri wa sheria ambao unavutia kila anayetaka kuwekeza katika sekta mbalimbali ikiwamo ya kilimo.

Mchumi Mwandamizi Kitengo cha Masoko wa Wizara ya Viwanda na Biashara, Aneth Mathania, aliwaeleza wawekezaji kuwa Tanzania ina ‘barcode’ yake, hivyo wakiwekeza mazao yao hayatapata shida ya soko.

“Tanzania imeweka utaratibu mzuri kuhakikisha uzalishaji wa zao hilo katika mnyororo wake wanapata faida, wakiwamo wakulima, wasindikaji na wasafirishaji,” alisema.

Pia alisema vifungashio vya zao la korosho vinatolewa na Shirika la Viwanda Vidogo (SIDO) hivyo fursa ya uzalishaji wa zao hilo ni kubwa.

chanzo;tanzania daima