Tasaf yataka ushirikishwaji wananchi

KAMATI Tendaji ya Taifa ya Mfuko wa Maendeleo ya Jamii (Tasaf), imewahimiza viongozi kutambua umuhimu wa kuishirikisha jamii katika kuibua na kuchangia utekelezaji wa miradi kwenye maeneo yao ili kuifanya kuwa endelevu na yenye tija kwa wananchi.

Akizungumza na wanavijiji wa Imekuwa na Majengo katika Halmashauri ya Wilaya ya Mtwara mkoani Mtwara, Makamu mwenyekiti wa kamati hiyo ambaye pia ni Mkuu wa Mkoa wa Mbeya, Abbas Kandoro, alisema kuwa hali hiyo itasaidia kuwafanya wananchi kuibua na kuendeleza miradi mingi ya maendeleo na kujiondolea umasikini.

Akizungumzia utekelezaji wa miradi hiyo, Kandoro alisisitiza umuhimu wa kuikamilisha kwa wakati ili kuwasaidia walengwa.

Kandoro aliongeza kuwa hivi sasa Tasaf iko katika hatua ya utekelezaji wa miradi ya awamu ya tatu, inayolenga kuziokoa familia masikini katika zaidi ya kaya milioni 1.2 zinazokabiliwa na umasikini ifikapo mwaka 2015.

Naye Mkurugenzi Mtendaji wa Tasaf, Ladislaus Mwamanga aliwapongeza wakazi wa vijiji vya Imakuwa na Majengo kwa jitihada zao za kuibua mradi wa zahanati ya Imakuwa ambayo imejengwa kwa fedha toka Tasaf na mchango wa nguvu za wananchi wa vijiji hivyo na kuwatatulia tatizo la kusafiri umbali wa zaidi ya kilomita nane kufuata huduma za afya.

Baadhi ya wakazi wa vijiji hivyo, waliipongeza Tasaf kwa kuwezesha miradi ya maendeleo inayoibuliwa na wananchi nchini bila ubaguzi.

Kamati Tendaji ya Taifa ya Tasaf, tayari imekagua miradi minne katika Manispaa ya Mtwara Mikindani na Halmashaura ya Mtwara ambako Tasaf imechangia sh bilioni 6 kuendeleza miradi ya ujenzi wa miundombinu mbalimbali katika nyanja za elimu, afya, barabara, uzalishaji mali na uwekezaji katika halmashauri hizo.

Chanzo: Tanzania Daima