NHIF kuzawadia halmashauri

MFUKO wa Taifa wa Bima ya Afya (NHIF), utaanza kutoa zawadi kwa halmashauri zitakazoandikisha kaya nyingi katika Mfuko wa Afya ya Jamii (CHF).

Hayo yalibainishwa juzi na mjumbe wa bodi ya wakurugenzi ya mfuko huo, Charles Kajege, katika mkutano wa wadau wa NHIF na CHF uliofanyika kwenye ukumbi wa Makonde Beach mjini hapa.

Kajege alisema Menejimenti ya NHIF inakamilisha mapendekezo hayo na wao katika bodi wayaangalie, ili kusudi iwe ni kichocheo cha kufikia afya bora kwa wote.

Alisema vigezo vitatangazwa na wamewaambia waangalie namna wadau watakavyoshiriki katika jopo la majaji watakaoendesha zoezi la kuwapata washindi kitaifa na tuzo hiyo wataiita ‘Social Health Insurance For All Award’.

Alisema malengo ya kitaifa ya CHF ni kila mkoa na halmashauri waweke mikakati ya kuifikia, kwani ni agizo la serikali kuwa ifikapo mwaka 2015 Watanzania wanaohudumiwa na NHIF na CHF ifikie asilimia 30.

Meneja wa NHIF Mkoa wa Mtwara, Joyce Sumbwe, aliwaomba viongozi wa serikali ngazi ya mkoa, wilaya na halmashauri, suala la NHIF na CHF kwao liwe ajenda kwenye vikao vyao na wanapokutana na wananchi wawasisitizie juu ya kujiunga na mifuko hiyo, ili wanapougua iweze kuwasaidia.

Mkuu wa Mkoa wa Mtwara, Kanali mstaafu Joseph Simbakalia, aliwataka wanachama wa NHIF na CHF kutumia kadi zao za matibabu kwa kuzingatia taratibu zilizopo, waache mtindo wa kuazimishana kadi za matibabu au hata kufanya biashara ya kadi hizo kwani kufanya hivyo ni kinyume na sheria za mfuko.

Chanzo;Tanzania Daima