Mashirika yalia uharibifu wa mazingira

Masasi, Katika kuhakikisha vitendo vya uharibifu wa rasilimali za nchi ikiwemo uwindaji haramu na ukataji miti ovyo kwa ajili ya mbao inapungua, Serikali kupitia Wizara ya Maliasili na Utalii imeombwa kushirikisha mashirika yasiyo ya kiserikali (NG’Os) katika utelekezaji wa mikakati ya uhifadhi wa rasilimali za Taifa ikiwemo misitu.

• Ombi hilo lilitolewa jana na viongozi wa mashirika yasiyo ya kiserikali kutoka Mikoa ya Lindi, Mtwara na Ruvuma walipokuwa katika mafunzo ya siku kumi ya kuzijengea uwezo asasi hizo juu ya uhifadhi na matumizi endelevu ya maliasili yaliyoratibiwa na Shirika la Uhifadhi wa Mazingira Duniani (WWF).

Wakizungumza kwenye mafunzo hayo washiriki hao walisema serikali lazima ichukuwe hatua ya kuanza kushirikiana na mashirikka yasiyo ya kiserikali katika kutoa elimu kwa jamii kuhusu matumizi bora na uhifadhi wa rasilimali misitu hatua ambayo itasaidia kudhibit upotevu wa rasilimali za Taifa.

Abdulah Mbelenje, Katibu wa Asasi ya NOSODE ya Wilaya ya Nachingwea,Mkoa wa Lindi alisema kutokana na serikali kutekeleza programu zake za uhifadhi wa mazingira bila ya kushirikiana na mashirika yasiyo ya kiserikali, bado jamii imeendelea kutokuwa na ufahamu wa kutosha juu ya umuhimu wa utunzaji wa mazingira hali ambayo inasababisha kuwafanya wananchi waishio pembezoni mwa misitu kuvamia rasilimali hiyo na kuharibu ovyo.

“Asasi zetu zinafanya kazi karibu na jamii, hivyo kama zingewezeshwa vizuri na serikali kwa kupatiwa ruzuku ili kutimiza shughuli zake na pia kupata ushirikiano wa karibu malengo ya kudhibiti uharibifu wa mazingira yangefanikiwa na kwamba kasi ya upotevu wa rasilimali za taifa ingepungua,”alisema Mbelenje.

Aidha Katibu huyo alisisitiza kuwa serikali iache kutoa vibali kiholela vya uvunaji wa misitu,badala yake ishirikiane kwa pamoja na mashirika hayo katika kutoa elimu kwa jamii juu ya uhifadhi wa misitu ili tkulinda vyanzo vya maji.

Kwa upande wake, mratibu wa mradi wa ushirikishwaji jamii katika uhifadhi na matumizi endelevu ya misitu kutoka shirika hilo la WWF kanda ya Ruvuma, Nalimi Madatta alisema lengo la kutoa mafunzo hayo kwa asasi hizo 20 kunalenga kuzijengea uwezo juu ya uhifadhi na matumizi endelevu ya misitu ikiwa ni pamoja na kuziunganisha ili ziweze kufanya kazi kwa pamoja.

Alisema mafunzo hayo pia yalilenga kutoa elimu ya mbinu za uanzishaji wa miradi ya ujasiriamali ikiwemo ufugaji wa kuku wa kisasa ili na wao wakawe mabalozi katika maeneo yao wanakokwenda kuweza kuielimisha jamii kuanzisha miradi mbalimbali ya ujasiriamali hiyo itakuwa njia mbadala kwa wananchi kujikwamua na umasikini.

Wilaya zilizopata fursa ya kushiriki katika mafunzo hayo ni Liwale, Nachingwea, Nanyumbu na Tunduru huku kila asasi ikiwakilishwa na wajumbe watano kutoka kwenye maeneo ambao hao watatakiwa kwenda kusambaza elimu waliyoipata ili jamii iweze kubadilika na kuthamini rasilimali za taifa.
Chanzo;Mwananchi