VIONGOZI WATAKIWA KUITISHA VIKAO

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

VIONGOZI wa vijiji, kata na wilaya, wametakiwa kuitisha vikao vya kisheria kwa wakati, ili kutoa taarifa ya hali ya mambo yanavyoendelea na hivyo kujenga imani na wananchi wanaowaongoza.

Ushauri huo ulitolewa juzi na Kaimu Katibu Tawala wa Wilaya ya Nanyumbu, Salumu Palangyo, alipokuwa akitoa mada juu utawala bora katika mdahalo wa mchakato wa katiba.

Alisema ni wajibu wa viongozi kutoa mrejesho kwa wananchi wanaowaongoza na kwamba kushindwa kufanya hivyo ni kwenda kinyume na utawala bora.

Mdahalo huo ulioandaliwa na mtandao wa mashirika yasiyo ya kiserikali Mkoa wa Mtwara (MRENGO) na kufadhiliwa na The Foundation for Civil Society, ulijumuisha makundi mbalimbali yakiwemo ya walemavu, wastaafu, wajane, vijana waliopo shuleni, vijiweni, madiwani na viongozi wa kuchaguliwa na kuteuliwa.

Kaimu Katibu Tawala huyo aliwakumbusha viongozi kutoa mrejesho kwa wanaowawakilisha kwa kufanya mikutano au kutoa taarifa katika mbao za matangazo kwenye maeneo ya wazi.

“Ni wajibu wa viongozi kutoa mrejesho kwa wanaowaongoza… wewe kama ni diwani au mbunge usipokuwa na utaratibu wa kutoa mrejesho maana yake hutakuwa mwakilishi wa watu.

“Kwa upande wa vijiji mnatakiwa kufanya mikutano kila baada ya miezi mitatu na kabla hujaenda kwenye vikao unatakiwa kupata maoni ya watu wako na unaporejea pia wape kile kilichotokea kule,” alisema Palangyo.

Palangyo ambaye kitaaluma ni mwanasheria, alieleza wananchi nao wana wajibu wa kuhudhuria vikao na mikutano inayowahusu na kuwaeleza kuwa wanapokuwa katika mikutano hiyo wana haki ya kuhoji na kupatiwa ufafanuzi juu ya masuala ya fedha na miradi inayoendeshwa katika maeneo yao.

Chanzo:Tanznia Daima