Rahaleo walia na uhaba wa majengo

KITUO cha Kanisa la Evangelist Assemblies of God Tanzania (EAGT) cha   Rahaleo Mtwara hakina majengo ya kuwalelea watoto yatima takriban 53 kituoni hapo.
Hayo yalibainishwa mwishoni mwa wiki na mkurugenzi wa kituo hicho Caroline Mkwele wakati wafanyakazi wa  Kampuni ya Simu za Mkononi ya Vodacom Tanzania walipotembelea kituoni hapo kukabidhi msaada wa chakula, fedha na vitu mbalimbali.
Alisema hali hiyo inasababisha baadhi ya watoto kulelewa na walezi majumbani.
“Changamoto tulizonazo ni nyingi lakini zaidi ni hili la kukosa kituo rasmi kwa maana ya majengo ya kuwahifadhi watoto hawa kwa pamoja, usipowaweka hawa watoto pamoja uwezekano wa kuwa na tabia tofauti ni mkubwa.
“Hivyo kutokana na ukosefu wa kituo inatulazimu kukutana na watoto hawa kila siku ya Jumamosi,” alisema.
Meneja wa Vodacom Kanda ya Kusini Henry Tzamburakis alisema yatima wanahitaji kupata elimu na mahitaji muhimu kama walivyo watu wengine.
“Napenda kutoa wito tusingojee mpaka kampuni ijikusanye ndio tuje kutoa msaada, mtu yeyote anaweza kufanya hivi kwani haihitaji mpaka uwe tajiri sana, ukiwa na chakula, nguo, chochote kile ambacho unaona kitawafaa watoto hawa usisite kuwaletea,” alisema Tzamburakis wakati akitoa msaada.
Boniface Seleman mmoja wa watoto yatima wanaolelewa katika kituo hicho alisema: “Tunashukuru kwa msaada huu, nawaomba msife moyo kutusaidia kwani bado tunahitaji sana na pia tunathamini kwa kile mnachokifanya.” 
Chanzo;Tanzania Daima