KINGEREZA SHULE ZA MSINGI NI UTUMWA

HI, mambo vipi mdau, tumshukuru Mungu kwa kuwa bado tunaishi, kuna waliopenda kuwa hai leo lakini hawapo, wamekwenda, wametangulia, wameimaliza safari yao, tutafuata, wapumzike kwa amani. Shida na raha ni sehemu ya maisha yetu, tuombeane heri tufanikiwe katika yote tuliyopanga kuyafanya mwaka huu 2014, tuyafurahie maisha leo lakini tujenge msingi bora kwa ajili ya kesho.

Nafurahi kwa sababu tunawasiliana na tunapeana moyo kwa lugha yetu ya Kiswahili, nafahamu kwamba kuwa Watanzania wanaojisikia fahari kujionesha kuwa wanafahamu zaidi Kiingereza au lugha nyingine za nje kuliko lugha ya taifa lao, wanajidhalilisha, na wamekubali kuwa watumwa!

Ni watumwa kwa sababu fikra zao bado zimefungwa kwa minyonyoro ya ukoloni wa fikra kiasi cha kusababisha waone kuwa hata lugha ya taifa lao si ya maana na pia haifai hata kufundishia shule za msingi.

Inasikitisha sana kumsikia Mtanzania anaunga mkono eti masomo yote shule za msingi yafundishwe kwa Kiingereza. Kuna sababu zipi za msingi kufundisha masomo yote shule ya msingi kwa lugha ya kigeni?

Kwa nini tunaidharau lugha yetu ya Taifa? Hivi leo ukienda Japan, Uingereza, China, Russia, Hispania, Ujerumani, Ureno wanatumia Kiswahili kufundishia kwenye shule zao? Jibu ni rahisi tu, hawafanyi hivyo, na ni kwa sababu wanathamini lugha zao, ni kipaumbele cha kwanza ndipo nyingine zifuate. Lugha ni utambulisho wa wapi unatoka, ni bidhaa na nyenzo muhimu katika mahusiano yetu na mataifa mengine, iweje leo tukithamini Kiingereza kuliko lugha ya Taifa letu?

Utajitambulisha wewe ni Mtanzania kwa kuzungumza Kiingereza? Utasemaje unaipenda Tanzania wakati unakidharau Kiswahili? Unafiki! Yaani wakati watu wanafikiria uwezekano wa kutumia Kiswahili kufundishia vyuo vikuu leo kuna Watanzania wanapayuka kuunga mkono fikra za kinyonge na zisizo na mashiko yoyote?

Kuthamini lugha za nje kuliko Kiswahili ni utumwa wa kifikra, na si kweli na kamwe haitakuwa hivyo, kwamba, eti usomi ni kufahamu zaidi Kiingereza. Kuna Watanzania wanasema wanaipenda kwa moyo wote, lakini kwa matendo yao ni wanafiki.

Kufahamu Kiingereza si kigezo pekee cha kukufanya uwe msomi mzuri, na si wote wanaofahamu lugha hiyo wanaweza kujenga hoja na kuzitetea, au wanaweza kutetea maslahi ya jamii wanayotoka au nchi, tukatae kutawaliwa na kujidhalilisha, tuache kuishi kwa mazoea, tuthamini vya kwetu zikiwemo lugha zetu kwa sababu ni kielelezo cha utamaduni wetu.

Unaposema upo huru zitathimini fikra zako, unahitaji fikra huru, huwezi kuizungumzia Tanzania na usiitaje lugha ya Kiswahili kwa sababu ndiyo lugha ya Taifa hili, na huwezi kumzungumzia Mtanzania na ukaacha kuitaja lugha hiyo kwa sababu ndiyo lugha ya nchi yake, kama wewe unakithamini Kiingereza kuliko Kiswahili, wewe ni mnafiki, uzalendo wako ni wa mashaka na unajidhalilisha.

Chanzo;Habari leo