TIC KUKUZA UWEKEZAJI MTWARA

KITUO cha Uwekezaji nchini (TIC) kimesema kitaendelea kushirikiana na Ofisi ya Mkuu wa Mkoa wa Mtwara, ili kuendelea kuhamasisha na kuvutia wawekezaji wa ndani na nje ya nchi katika mkoa huo wenye fursa nyingi.

Mkurugenzi Mtendaji wa kituo hicho, Juliet Kairuki, alieleza hayo waandishi wa habari wakati wa ziara yake mkoani hapa mwishoni mwa wiki, kwamba ni katika kuimarisha mahusiano hayo ya kikazi kati ya pande hizo mbili maendeleo yatakapopatikana.

Katika ziara hiyo, mkurugenzi huyo alikutana na Mkuu wa Mkoa wa Mtwara, Kanali mstaafu, Joseph Simbakalia na maofisa wengine na pia kujionea shughuli za uwekezaji zinazoendelea kufanyika.

“Mazungumzo yetu yamekuwa ya manufaa, panahitajika ushirikiano mkubwa kati yetu ili kuzidi kukuza uwekezaji katika mkoa huu,” alisema.

Alisema mazingira hayo ya ushirikiano yakizidi kujengwa, yatasaidia shughuli za kukuza uwekezaji na kufikia malengo yanayohitajika.

Kairuki  alisema panahitajika kuwajengea uwezo maofisa wa Ofisi ya Mkuu wa Mkoa, ili nao washiriki kikamilifu katika kufikia malengo ya uwekezaji.

Alisema pia ofisi yake itaendelea kushirikiana na taasisi nyingine za serikali na sekta binafsi, ili lengo katika mkoa huo litimie.

Alifafanua mkoa huo una fursa nyingi za uwekezaji zikiwemo za utalii, uzalishaji kwenye viwanda na biashara na kuwa muhimu ardhi iandaliwe kwa ajili ya wawekezaji wanaoenda kuwekeza.

Alisema bandari nzuri mkoani hapa na pia maeneo yaliyotengwa na serikali kwa ajili ya uwekezaji ni moja ya sababu kubwa zinazovutia wawekezaji katika sekta mbalimbali.

“Serikali ikiendelea kutenga maeneo kama hayo itasaidia sana katika uwekezaji,” alisema Kairuki na kuongeza kituo chake kwa sasa kinaandaa hati za ardhi na kuweka miundombinu ya msingi katika maeneo hayo, ili kurahisisha na kuvutia wawezekezaji zaidi.

Alisema kufanikisha kwa jambo hilo kunategemea zaidi ushirikiano na taasisi nyingine za serikali ili kutatua tatizo la ardhi ambalo wakati mwingine linakuwa ni kikwazo kikubwa katika uwekezaji.

Katika ziara hiyo, alitoa ripoti ya hali ya uwekezaji kwa mkuu wa mkoa ili aweze kuwa na ufahamu wa wawekezaji wanaokuja kuwekeza katika mkoa wake, hasa wale waliopitia katika kituo chake na kujisajili.

Sambamba na hilo, pia alikagua hati za ardhi zinazotolewa na kituo chake kwa wawekezaji waliowekeza mkoani hapa kwenye miradi mbalimbali.

Alisema alifanya hivyo sababu wawekezaji wengine hawafuati sheria sawasawa na hawatoi ripoti zao, hivyo kituo chake hakiwezi kufahamu wanaendelea vipi bila ya kutembelea miradi hiyo na aliahidi kuendelea kufanya hivyo

 Chanzo;Tanzania Daima