MADIWANI LIWALE ‘WAMCHARUKIA’ MTENDAJI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MADIWANI wa Halmashauri ya Wilaya ya Liwale, Lindi wamempa siku 10 Mtendaji wa wilaya hiyo kuhakikisha anachukua hatua za kisheria kwa kamati zinazosimamia miradi.
Hatua hiyo imetokana na kuchoshwa na uchakachuaji
unaofanywa na kamati za usimamizi wa miradi mbalimbali ya ujenzi katika kata.

Wakizungumza kwenye kikao cha Baraza la Madiwani, hivi karibuni, baadhi ya madiwani walisema kuwa kamati hizo za usimamizi hazina uchungu hali inayosababisha miradi kutokamilika na mingine kuwa katika kiwango cha chini.
Mwenyekiti wa Halmashauri hiyo, Abasi Matulilo, alisema  uzembe wa kamati hizo unachangiwa na udhaifu wa serikali za vijiji ambazo ndizo zenye jukumu la kuchukua hatua na kumwagiza mtendaji kuwachukulia hatua za kisheria na kinidhamu watendaji wa vijiji hivyo kwa kushindwa kuzisimamia kamati.
“Kamati ambazo zimeathiri utelekezaji wa mradi ni pamoja na kamati ya usimamizi wa ujenzi wa nyumba ya mwalimu katika kijiji cha Miluwi, nyumba haijaisha licha ya vifaa vyote kununuliwa na vimeachwa na ni wazi saruji itakuwa imeharibika,”alisema.
Alisema uzembe huo pia umeonekana katika kijiji cha Ngonji Kata ya Nahoro, kwa kushindwa kujenga ofisi ya kijiji hicho na nyumba ya mwalimu licha ya fedha na vifaa kutolewa.
Chanzo:Tanzania daima

LIPUMBA KUTUA MTWARA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MWENYEKITI wa Chama cha Wananchi (CUF), Taifa, Profesa Ibrahimu Lipumba, anatarajiwa kuwasili Mtwara mjini kesho akitokea Mtwara Vijijini alikofanya ziara ya kikazi.
Lipumba yuko katika ziara ya kikazi ya kuzunguka mkoa huo, ambako alianza ziara hiyo  Oktoba  2, mwaka huu, Wilayani Nanyumbu, Masasi, Newala, Tandahimba, Mtwara Vijijini na kuhitimisha Mtwara Mjini kwa mikutano miwili ya hadhara Oktoba 13 na 14 mwaka huu.
Akizungumza na Waandishi wa Habari katika ofisi za Chama hicho juzi, Katibu wa CUF Wilaya ya Mtwara Mjini, Saidi Kulaga, alisema kuwa Mwenyekiti huyo atapokelewa saa mbili asubuhi asubuhi katika eneo la Ghalani Mikindani.
Kulaga, alisema kuwa Mwenyekiti huyo baada ya kupokelewa, atakwenda moja kwa moja kufungua Ofisi ya Chama hicho Mtwara Mjini na matawi matano kabla ya jioni kufanya mkutano wa hadhara kwenye viwanja vya Ghalani Mikindani.
Alibainisha kuwa siku ya pili ya ziara yake, ataanza na vikao vya ndani na viongozi wa CUF, Matawi, Kata na Wilaya kisha na Wazee mbalimbali bila kujali chama, lengo ikiwa ni kubadilishana mawazo, kisha atafungua matawi mengine manne na jioni atawahutubia wananchi wa Mtwara Mjini pamoja na vitongoji vyake kwenye viwanja vya Mashujaa.
Pamoja na mambo mengine, CUF Mkoa wameitaka  Serikali kupitia Wizara ya Mambo ya Ndani ya Nchi,  kuondoa mara moja vikosi mbalimbali vya majeshi vilivyokuwa vimeletwa Mtwara kwa dhana ya ukosefu wa amani.
Alibainisha kwamba, kuendelea kuwepo kwa vikosi hivyo ni kwenda kinyume na kauli yao wenyewe, lakini pia kuzuia demokrasia ya kweli kwa mikoa ya kusini

MAOFISA USHIRIKA WATAKIWA KUISIMAMIA SHERIA MPYA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

KAIMU Katibu Tawala mkoani Mtwara, Johansen Bukwali, amewataka maofisa ushirika nchini kuijua vizuri na kuisimamia sheria mpya ya Vyama vya Ushirika namba 6 ya mwaka 2013, kwani vyama hivyo vina nafasi kubwa ya kubadilisha maisha ya Watanzania wengi.
Wito huo umetolewa jana mjini hapa katika ufunguzi wa mafunzo ya siku nne ya Mfumo wa Ukusanyaji na Uchambuzi wa Taarifa na Takwimu za Vyama Vya Ushirika kwa Maofisa Ushirika kutoka mikoa ya Lindi na Mtwara, inayofanyika ukumbi wa Veta.
Bukwali, alisema suala la upatikanaji wa uhakika wa taarifa na takwimu za vyama vya Ushirika ni mojawapo ya changamoto zinazozikabili nchi nyingi za Kiafrika ikiwemo Tanzania, hali inayofanya mchango wa vyama hivyo usiweze kutambulika kwa urahisi.
“Sote hapa tunafahamu mchango mkubwa unaotolewa na vyama vya Ushirika katika uuzaji wa mazao kupitia AMCOS na pia uwezeshaji wa huduma za kifedha unaofanywa na Saccos… kutaja kwa uchache mchango wa Ushirika katika maisha ya wananchi wetu katika Nyanja mbalimbali za uchumi zikiwemo kilimo, ufugaji, uvuvi, ufundi, biashara na ujasiriamali kwa ujumla,” alisema na kuongeza:
Nimejulishwa kwamba, tayari mafunzo kama haya yameshatolewa katika mikoa 18 na tukikamilisha Mtwara na Lindi kutabaki mikoa mitano ambayo itaingizwa katika awamu ya pili ya mafunzo.
Chanzo:Tanzania Daima

PROF. LIPUMBA KUNGURUMA MTWARA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.
Prof, Ibrahim Lipumba.

Baada ya serikali kutangaza kuruhusiwa kwa mikutano ya hadhara katika mikoa ya Kusini ya Mtwara na Lindi kwa takribani mwaka mmoja,  Chama cha Wananchi (CUF) Mkoa wa Mtwara, kinafanya maandalizi ya kumpokea Mwenyekiti wa chama hicho, Prof, Ibrahim Lipumba, ambaye atafanya mikutano ya hadhara miwili mjini Mtwara.

Kiongozi huyo ambaye yupo mkoani humo kwa ziara ya kikazi, anatarajiwa kuwasili Mtwara mjini Oktoba 13, mwaka huu.

Akizungumza na NIPASHE katika ofisi za CUF mjini Mtwara, Katibu wa chama hicho mkoani humo, Said Kulaga, alisema anaandaa barua kwa ajili ya kuomba kibali polisi cha mapokezi ya kiongozi huyo.

“Mwenyekiti (Lipumba) yupo katika mkoa wetu kwa ziara ya kikazi, tunaishukuru serikali kufungua mikutano, naandaa barua kwa ajili ya kuomba kibali kwa  OCD cha kumpokea Mwenyekiti wetu, naamini tutakubaliwa kwa sababu tamko limetoka ” alisema na kuongeza:

“Tutakuwa na mapokezi makubwa ya pikipiki, magari, bajaji pamoja na magari na yatakayoanzia Ghalani Mikindani saa 2:00 asubuhi na baadaye atazindua ofisi ya chama mkoa.”

Alisema baada ya uzinduzi huo, Prof Lipumba atazindua matawi matatu  ya chama hicho kabla ya kiongozi huyo kufanya mkutano wa adhara Ghalani Mikindani.

Kulaga, alisema siku ya pili  ya ziara yake, Prof. Lipumba atakuwa na mkutano na viongozi wa CUF wa wilaya, jumuiya za kata na matawi yote ya chama hicho, na kisha atahutubia wananchi wa Mtwara mjini katika uwanja wa Mashujaa.

Akizungumza na NIPASHE kwa njia ya simu, Mkuu wa Mkoa wa Mtwara, Kanali Mstaafu  Joseph  Simbakali, alisema: “Sina neno juu ya tamko hilo maana tayari serikali imetangaza kuruhusu mikutano na hakuna serikali mbili,” alisema na kuongeza: 

“Mimi nitakupa maneno, lakini nimeazima ya Baba wa Taifa, ‘uhuru wa kujitawala bila demokrasia ni udikiteta, lakini uhuru bila nidhamu ni fujo.” 

Alisema kuruhusiwa kwa mikutano hiyo isiwe mwanzo wa fujo, matusi na kejeli na kuonya kuwa endapo mtu atajihusisha na uvunjaji wa amani na kuleta vurugu sheria itachukua mkondo wake.
 
CHANZO: NIPASHE

BAVICHA YALAANI UKIUKWAJI HAKI ZA BINADAMU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.
Mwenyekiti wa BAVICHA Taifa, Patrobass Katambi
BARAZA la Vijana la Chama cha Demokrasia na Maendeleo (BAVICHA), limelaani vikali kukithiri kwa muendelezo wa matukio ya ukiukwaji sheria na haki za binadamu unaofanywa na jeshi la polisi na serikali ya Chama Cha Mapinduzi (CCM).
Kauli hiyo, imetolewa jana na Mwenyekiti wa BAVICHA Taifa, Patrobass Katambi, wakati akitoa tamko kwa niaba ya Vijana na wadau wa amani, haki na usawa duniani kote.
Alisema CCM inatumia jeshi la Polisi kutekeleza malengo yake ya kisiasa ili kuua ushindani wa kisera.
Alisema kwa mjibu wa ibara ya 12 ya Katiba ya Jamhuri ya Muungano wa Tanzania, inayosema kila binadamu wamezaliwa huru na wanayo haki sawa na wanapaswa kuheshimiwa, pia ibara ya 13 (3) inatoa ulinzi wa haki za kiraia, kimajukumu na matakwa ya mtu au jamii na 13 (4) inaagiza mtu yeyote kutobaguliwa na mtu au mamlaka yoyote.
“Tunaitaka Serikali itoe tamko na iwatangazie Watanzania na Umoja wa Mataifa kama ibara ya 3 (1),12, 13, 14, 18 na 21 za Katiba ya Jamhuri ya Muungano ya Mwaka 1977 hazitumiki na Serikali haizitambui mbali na viapo vya kuitii na kuilinda kwa viongozi wote akiwemo Rais Jakaya Kikwete.
“Pia serikali iwatamkie kwamba utii wa sheria bila shuruti utekelezwe na raia, vyama vya upinzani, wanaharakati wa haki za binadamu na wanahabari na siyo viongozi wa serikali, polisi na watawala,” alisema Katambi.
Aidha, alisema Serikali ya Tanzania itangaze kuwa haitambui na haifungwi na tamko la ulimwengu la haki za binadamu mwaka 1948 ya mkataba wa kimataifa unaopinga unyanyasaji na kutesa binadamu na mkataba wa haki za kisiasa na za kiraia 1966, pia na mkataba wa Afrika wa haki za binadamu na watu.
Alisema, Sheria ya vyama vya siasa ya Mwaka 1992 na Katiba ya Tanzania ya 1977, zinatoa haki ya maandamano ya amani kupinga ukiukwaji wowote wa haki, usawa, sheria, taratibu au kanuni msingi ya asili na kama inazitambua, iwachukulie hatua watendaji waliokiuka matakwa ya sheria.
Katika hatua hiyo, alisema endapo Serikali itapuuza malalamiko na madai dhidi ya unyama huo unaofanywa na jeshi la polisi kwa kushirikiana na chama tawala, hawatasita kuingia mtaani kupambana na kujichukulia sheria mkononi.

MWANAFUNZI AJIUA


Mwanafunzi wa darasa la tatu Ahmad mtuna(10) shule ya msingi Mnomo kata ya msangamkuu wilaya ya Mtwara amekufa baada ya kujinyonga kwa kamba ya manira nyumbani kwao alipokuwa akiishi.

Tukio hiko limetokea Jana majira ya saa tano asubuhi nyumbani kwao ambapo Ahmad anajinyonga familia yake ilikuwa nyumba ya jirani katika shughuli ya maulid.

Kamanda wa polisi Mkoa wa mtwara Augustino Olomi alipotafutwa ili aelezee tukio hilo amekiri kujinyonga kwa mtoto huyo na amesema tayari ameshatuma maofisa wake wameshaenda eneo la tukio na atatoa taarifa kamili uchunguzi ukikamilika.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MKUU WA MKOA APATWA NA HOFU

Mkuu wa mkoa wa Mtwara Joseph Simbakalia ameeleza wasiwasi juu ya nchi kuhujumiwa iwapo biashara ya gesi itaachwa mikononi mwa wageni pekee.Ameeleza kuwa na taarifa za kampuni za kigeni zinavyojiandaa kufanya biashara zote katika Mradi wa bomba la gesi kutoka Mtwara na songosongo na kutaka serikali kuwa macho na suala hilo.

Hayo yamebainishwa  wakati Bodi ya wakurugenzi ya shirika la maendeleo ya Petrol Tanzania chini ya mwenyekiti wake Michael Mwanda walipofanya mazungumzo na uongozi wa mkoa wa Mtwara kwenye ziara ya kukagua maendeleo ya ujenzi wa bomba la gesi ulio katika hatua za mwisho kukamilika.
Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

FAWOPA YAWAPA SOMO WANAFUNZI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.


MWENYEKITI wa Shirika lisilo la kiserikali la Faidika Wote Pamoja (Fawopa-Tanzania) la mkoani Mtwara, Saidi Nassoro, amewataka wanafunzi kusoma kwa bidii, ili kuweza kufikia malengo yao waliojiwekea.
Nassoro alitoa kauli hiyo hivi karibuni wakati akikabidhi hundi ya sh. milioni 5.7 kwa ajili ya watoto 19 watakaosoma masomo ya ufundi umeme kwa miezi 6 kwa Mkuu wa Chuo cha Maendeleo ya Wananchi Mtawanya, Edwin Wandeha.
Alisema katika halmashauri hiyo kuna watoto wengi wanaoishi katika mazingira hatarishi, lakini wao wamebahatika kupata nafasi ya kuchaguliwa, hivyo waitumie vizuri, ili iweze kuwaisaidia kwenye maisha yao ya baadae.
“Kaeni vizuri chuoni, wasikilizeni walimu wenu na masharti ya chuoni ndivyo mtapata kile ambacho mlichokifuata hapa.
“Lengo letu kubwa ni kwamba mtakapotoka hapa chuoni mitaani muweze kujiajiri wenyewe kwa sababu hiyo fani ya fundi umeme ambayo mmeichagua  ni ‘hot cake kwa sababu kama unavyojua  hivi sasa katika halmashauri yetu  ya Mtwara-Mikindani kuna fursa nyingi  zinakuja kwa ajili ya gesi asilia na mafuta,” alisema.
Fawopa-Tanzania lilifanya utafiti mwaka 2012/2013 na kugundua watoto wengi wanaingia katika ajira mapema kutokana na umasikini uliokithiri miongoni mwa wazazi.
Chanzo:Tanzania Daima

MWANAFUNZI DARASA LA TATU AJINYONGA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MWANAFUNZI wa darasa la tatu shule ya Msingi Mnomo, Kata ya Msangamkuu, Wilaya ya Mtwara Vijijini, Ahmadi Mtuna (10), amefariki dunia baada ya kujinyonga na kamba ya manira katika kenchi za nyumba aliyokuwa akiishi.
Tukio hilo, limetokea jana majira ya saa 5 asubuhi, eneo la Kilimani Kata ya Msangamkuu, ambako Ahmadi wakati akijinyonga familia yake ilikuwa nyumba ya jirani kwenye Maulidi.
Akizungumza na Tanzania Daima kwa njia ya simu, mama mkubwa wa Ahmadi, Sikujua Saidi, alisema jana asubuhi walikwenda na Ahmadi kuchoma korosho maeneo ya barabarani, baada ya kumaliza alimuaga kuwa anarudi nyumbani ndipo alipomruhusu.
Sikujua, alisema naye baada ya kurudi nyumbani alikuta mlango uko wazi, ndipo alipoingia ndani kufunga, lakini kabla ya kufanya hivyo alipotupa jicho juu alimuona Ahmadi ananing’inia, akamuita Ahmadi, Ahmadi lakini ikawa kimya, ndipo alipotoka nje kukimbia kwenda kuwaita majirani kwenye Maulidi ili waje wamwangalie na walipofika walikuta ameshapoteza maisha.
“Inaniuma sana, mwanangu tulikuwa wote muda huu tukichoma korosho dakika chache tu kaniaga naenda nyumbani, kumbe alikuwa ananiaga sitaweza kumuona tena hapa duniani… kikweli siamini kabisa na kilichotokea… Hapa alipojinyongea chini yake tumekuta nazi ambayo haijatolewa maganda, nadhani alikuwa anacheza baada ya nazi kuteleza ndipo aliponing’inia na kamba ikamkaba shingoni na umauti ukamkuta,” alisema Sikujua na kuongeza:
Wakati Ahmadi anajinyonga, Babu na Bibi yake walikwenda nyumba ya jirani kwenye Maulidi, kwa hiyo nyumbani hakukuwa na mtu, alikuwepo pekee yake na kamba aliyojinyongea ilikuwa inatumika kufungia mbuzi, sasa yeye nadhani alikuwa anajaribu kufunga kama anavyofungwa mbuzi…Tutaongea kila kitu lakini ukweli anao yeye marehemu alichokuwa anafanya, maana ni mtoto mdogo hana akili ya kujua hiki ninachofanya ni kitu kibaya, yeye akili yake anajua anacheza kumbe ni hatari.
Kwa upande wake, Kamanda wa Polisi Mkoa wa Mtwara, Augustine Ollomi, alipotafutwa kwa simu kuthibitisha, alikiri kutokea kwa tukio hilo na kuwa tayari maofisa wake wamekwishakwenda eneo la tukio na watakaporejea ofisini na kumpa taarifa, atatoa taarifa zaidi kwa vyombo vya habari.

JAMII YATAKIWA KUTAMBUA MCHANGO WA WALEMAVU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
JAMII imetakiwa kutambua, pia kuthamini mchango unaotolewa na watu wenye ulemavu kwani watu hao wana uwezo mkubwa  katika kuchangia pato la familia na taifa.
Ushauri huo ulitolewa na Agnes Machenje, kwenye warsha  ya pamoja kuhusu mchango wa sekta ya habari katika kushughulikia watu wenye ulemavu, ambayo iliwashirikisha waandishi wa habari kutoka Shirika la habari Radio Valo ya nchini Finland na waandishi wa habari kutoka Shirika la habari na mawasiliano ya Jamii (Mtukwao Community Media) kutoka Mtwara pamoja na watu wenye ulemavu.
Machenje, alisema jamii bado hawajaitikia wito wa elimu juu ya watu wenye ulemavu hususani kwa watoto walemavu ambao hawapati haki yao ya msingi ukizingatia elimu.
“Jamii inatakiwa itambue na kufahamu juu ya elimu kwa watoto wao ambao ni walemavu kwani wamekuwa wakikosa elimu na kukosa haki yao ya msingi ukizingatia elimu kwao ni duni kutokana na kumuona mlemavu kama mtu ambae ni mzigo hawezi kufanya kitu chochote…Kinachotakiwa sasa watoto hao wapelekwe shule ili wakapate elimu ndio haki yao ya msingi na ya kikatiba.
“Wazazi ama Walezi walio wengi wao watoto  wao wenye ulemavu wanafungiwa majumbani wakiogopa aibu kuonekana nje na mtu mwingine kwamba yeye amezaa mtoto mlemavu yaani wanasema unaleta mkosi ndani ya familia kwa sababu mtu ukizaa mtoto mlemavu ina maana ni mkosi kwa jamii inayokuzunguka,” alisema Machenje.
Aliongeza kuwa, jamii bado haijapata mwamko wa elimu kujua mlemavu anaweza kufanya kitu kikubwa cha maana  ambacho mtu mwingine ambaye aliye na viungo vyake vilivyotimia angeweza kukifanya.
“Kinachotakiwa sasa jamii iondokane na mtazamo hasi wakimuona mlemavu wasimbague washirikiane naye kwani anaweza akatoa mawazo mazuri sana ambayo yanaweza kuinua jamii na taifa kwa ujumla…Kwa hiyo wajue kwamba mlemavu akiwezeshwa anaweza na asipowezeshwa itakuwa kikwazo lakini walemavu wana vipaji vya aina nyingi na anaweza kufanya kitu kizuri zaidi.
 Chanzo:Tanzania Daima

VIONGOZI CHADEMA MTWARA WASHIKILIWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
CHAMA Cha Demokrasi na Maendeleo (Chadema), Wilaya ya Mtwara Mjini, jana walishindwa kuandamana baada ya Jeshi la Polisi mkoani hapa, kuwashikilia viongozi wa chama hicho kuanzia saa moja asubuhi hadi sita mchana.
Maandamano hayo yalitarajiwa kufanyika kuanzia maeneo ya Makanaledi kupitia Mnarani, barabara ya Zambia, Stendi Kuu, Madukani, Bima, Coco Beach hadi viwanja vya Mashujaa, ambako wangezungumza na wananchi, lakini yalidhibitiwa na polisi ambao walionekana wakirandaranda kila kona pamoja na magari ya JWTZ kuhakikisha hakuna maandamano hayo.
Viongozi walioshikikiwa na polisi ni pamoja na Mwenyekiti wa Chadema Wilaya ya Mtwara Mjini, Ibrahimu Mandoa, Mkufunzi Chadema Mkoa, Ismail Liuyo, Katibu Stanslaus Sumi na Katibu Mwenezi Hassani Mbangile.
Akizungumza na Waandishi wa Habari mara baada ya kutoka kituo cha Polisi Wilaya, Mwenyekiti huyo wa Wilaya, Ibrahimu Mandoa, alisema jana Chadema Wilaya walikusudia kufanya maandamano ya amani katika Manispaa ya Mtwara-Mikindani kupinga kuendelea kwa Bunge maalum la Katiba linaloendelea Dodoma.
Alisema kuwa, kimsingi kila mtu atakuwa anaelewa kuwa Rais Kikwete na vyama vya siasa ambavyo viko chini ya TCD, walikuwabaliana kwa pamoja kwamba hakuna uwezekano wa kuweza kupatikana Katiba mpya sasa hivi mpaka 2016 ndio zoezi la mchakato mzima liendelee.
Kwa upande wake, Kamanda wa Polisi Mkoa wa Mtwara, Augustine Ollomi, alithibitisha kukamatwa kwa viongozi hao na kuhojiwa kwa sababu ya kusambaza vipeperushi kwa wananchi.
Ollomi, alisema kuwa viongozi wa Chadema walitoa taarifa ya kufanya mkutano Septemba 21, lakini Mkuu wa Polisi wa Wilaya (OCD), Andrew Ndassa, aliwakatalia kwa sababu zilizotolewa zilikuwa kinyume, wao walitaka kufanya mkutano kupinga Bunge maalumu ambalo linaendelea Dodoma, na kwa ufahamu wake bunge hilo liko kisheria sio kama wanavyodai Chadema.
Alisema, juzi walipata vipeperushi ambavyo vilikuwa vimeandaliwa na viongozi Chadema mkoani hapa wakiwashawishi wananchi washiriki katika maandamano, hivyo ndio sababu ya kuwaita kwa ajili ya mahojiano.
Chanzo:Tanzania Daima

WAFANYABIASHARA WAIOMBA SERIKALI KUONGEZA KINA CHA MAJI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 
WAFANYABIASHARA wanaotumia kivuko cha Kilambo kilichopo wilaya ya Mtwara vijijini, mkoani Mtwara, wameiomba Serikali kuona umuhimu wa kuongeza kina cha maji katika kivuko hicho.
Wakizungumza na Tanzania Daima juzi  wafanyabiashara hao, walisema kuwa kivuko hicho kinategemea maji kutoka mto Ruvuma na Bahari ya Hindi hivyo yanapokupwa kivuko hicho kinashindwa kufanya kazi.
Alisema kivuko hicho kimekuwa kikitumiwa na wananchi wengi ambao wanafanya safari zao  kwenda Msumbiji ama Tanzania,  lakini wamekuwa wakikumbana na adha hiyo.
Mohamedi Mumbea, dereva wa gari kubwa ambaye ni Mtanzania na mfanyabiashara , alisema kuwa kutokana na kina cha maji kuwa kifupi inawalazimu kukaa kwa muda mrefu kusubiri maji.
Akizungumzia tatizo hilo, Mkuu wa Wilaya ya Mtwara, Wilman Ndile, alisema kuwa Serikali inatambua uwepo wa tatizo hilo na kuwa hivi sasa aina mpango wa kuchimba kina hicho.
Hata hivyo Ndile, alisema kuwa wawekezaji wa gesi katika mkoa huo wana mpango wa kujenga daraja katika eneo hilo ambalo linaunganisha nchi za Msumbiji na Tanzania.
Chanzo:Tanzania Daima 

WANAHABARI WAANZISHA SACCOS

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 
 
KLABU ya waandishi wa habari mkoani hapa imekamilisha hatua muhimu katika kuanzisha chama cha kuweka na kukopa kwa wanahabari na wadau wao kitakachojulikana kama Mtwara Media Saccos.
Mwenyekiti wa klabu ya waandishi wa habari mkoani Mtwara MTPC, Hassan Simba, aliwaambia waandishi wa habari ofisini kwake jana kuwa hatua iliyofikiwa sasa ni ya uandikishaji wa wanachama baada ya kukamilisha kuipitia rasmu ya katiba ya chama hicho.
Simba, alisema kuwa rasimu ya katiba hiyo iliandaliwa na kamati maalumu iliyoundwa na kupitiwa na wadau wote na sasa imekamilika na kuweza kutumika kama katiba rasmi ya chama hicho.
“Hatua ya kwanza ilikuwa kuandika katiba ambayo ilizinduliwa na mkuu wa wilaya ya Mtwara Wilman Ndile katika mkutano wa wadau uliofanyika Januari mwaka huu…baada ya hapo ilipitiwa na wanahabari na wadau wao kisha ilirejeshwa kwa kamati ambayo imeipitia na sasa ipo tayari kwa kutumika,” alisema.
Mwenyekiti huyo alisema hadi sasa wadau wamejiandikisha na kujiunga na chama hicho chenye lengo la kuwajengea uwezo kiuchumi wanahabari mkoani humo ambao wengi wao ni wale ambao hawana sifa za kupata mikopo kutoka taasisi za fedha.
Mwenyekiti huyo alisema kuwa chama hicho kitakapokamilika kitakuwa mkombozi wa kiuchumi kwa wanahabari kwani kitatoa mikopo kwa masharti nafuu kwa wanachama wake.
Simba, alisema kuwa chama hicho kwa sasa kinaendeshwa chini ya uongozi wa juu wa MTPC kinatarajiwa kupata viongozi wake miezi mitatu ijayo ambapo kitafanya mkutano mkuu wa kwanza wa uchaguzi.
 Chanzo:Tanzania Daima
 
Supported by Tone Multimedia Company Limited
Copyright © 2012. Mtwara yetu - All Rights Reserved
Designed by Fredy Tony Njeje
Proudly powered by Blogs za Mikoa